2009年8月27日星期四

遇上N年前的舊相識

昨晚趕著回家,一路上低著頭急步走,快要到達住所之際,突然被一名男子攔住,抬頭一看,此人年約三十幾四十,中國藉,身材高大屬於「黑黑實實」的類型,帶有粗邊黑框眼鏡,短頭髮,身穿T-Shirt及牛仔褲,胸前背著一個大背囊。滿以為這位陌生人想問路,未及開口問他有何貴幹,他已叫出了我兒時的「花名」。那一刻我非常訝異,雖然對他有些少印象,但實在認不出他是誰,腦海中不斷搜索他的名字的同時,我的本能反應驅使我和他扮老友握手加擁抱,當時的對話如下,括號內是我當時腦海中的說話:

陌生人:「喂,苦瓜!」

苦瓜:「Hello(無辦法,還記不起他的名字)!你好嗎?好耐無見啦!」

陌生人:「都係咁啦,真係好耐無見啦,你住呢頭咩?」

苦瓜(腦中還在搜索他的名字...):「係呀,我住係呢頭!乜你都係住係呢頭咩?」

陌生人:「唔係,咁啱係呢頭探朋友呀。A君和B君好嗎?我地好耐無見啦!佢地仲係XX住呀?」

苦瓜(我都好耐無見A君和B君...):「啊,我都好耐無見佢地囉,唔知道佢地既近況係點。」

陌生人:「A君和B君喎?你都好耐無見佢地呀?」

苦瓜(連你我都唔記得係邊一個,無見A君和B君好耐好奇咩?):「係呀!都好耐無見囉。」

陌生人:「我呢家係XXX公司做,比張卡片你呀!」

苦瓜(有卡片就好啦,早d攞出嚟嘛,我仲未記得你係邊個呀!):「好呀!」

陌生人:「多多指教,有機會聯絡吓呀!」

苦瓜(瞄一眼卡片上的名字,肯定是N年以前認識的,不過還未想起他屬於那一堆朋友):「好呀!好呀!Bye-bye!」

道別以後拿著卡片拚命回想他是誰,最後依稀記得他是廿幾年前在某區青年中心的相識。中學時期喜歡和朋友到某青年中心的自修室溫習,是在那裡認識這位仁兄的。不過自從搬到另一區居住之後,已經和他沒有聯絡,如果不是他攔住我的話,我肯定是認不出他的。

說也奇怪,廿多年了,自己的外貌都轉變了不少,他居然可以認得出我,而且還記得我兒時的名字,但我卻對他毫無印象,實在慚愧。

&&&&&&&&

11 則留言:

篤篤篤撐 說...

去青年中心好AR,識多D人 !!! 

Ebenezer 說...

唔好太怪責自己,都成廿幾年前喇,就算係舊相好,家吓唔記得都係人之常情啫!

bittermelon 說...

篤篤篤撐:
係呀,青年中心幾好玩的,仲可以識吓d靚女社工添 :P

Ebenezer:
雖然咁講,但係以前點都叫做係Friend嘛,所以真係有d唔好意思.

篤篤篤撐 說...

靚女社工...冇la, 入行20幾年, 一件都未見過 (er, 有一件, 俾我私有化左了), 妹妹仔就有好多靚, 好彩我對妹妹仔冇興趣

Terence Yun 說...

You stil young lor!! yeah!!:D

肥貓 說...

証明你個樣子一如廿多年前, 沒有什麼轉變, 有咩駐顏秘方先?!

L L 說...

苦瓜,證明你 keep 得好,而且你一定能令人留下深刻印象。相反你的舊友可能样子變得太多了,即係:走晒樣....

陰功,我都俾人咁話過。

bittermelon 說...

篤篤篤撐:
原來你係社福界既,失敬失敬! :p

鹿米館:
我唔後生啦,人生第四個十年都嚟緊啦 >_<

肥貓:
駐顏秘方就無,"蛀"顏方法則大把 ^v^

laulong:
可能係我廿幾年前已經老態龍鐘,廿年係都咁老,所以認得我 :)

the8 說...

咁既情況我都試過...遇返同一個人仲要唔止一次...所以絕對明白你既感受!

(直到依家我對呢位朋友既名連係邊段時間識既都無頭絮!)

Quality Alchemist 說...

今天我就遇上N年前的舊相好....
大家說聲Hello就行了. 都好有件大隻佬伴佢.
沒有昨日的失敗, 那有今天的成功!

說...

哈,記不起一個廿年前的「舊相好」,好正常,我有一次在街遇到一個大學同學﹝我在沙士年畢業﹞,同系的,他叫我個花名,我認得他個樣,但記不起他的名,惟有跟你一樣:「畏,好耐無見啦,你點呀,仲有無同其他人聯絡呀......」

畏來畏去,都畏不出他的名來。

LinkWithin

Blog Widget by LinkWithin