2010年5月10日星期一

爽約受害的不是別人而是自己

蔡瀾先生最近寫了篇題為《不玩》的文章,道出當前一些年輕人怕難及負面的心態。上周寫了篇《搵工難 搵人一樣難》的博文,提到朋友C君最近在招聘人手當中受了不少年輕人的氣,令他對年輕人有了介心。究竟時下的年輕人怎麼了?

C君遇到的事情是這樣的,他在第一輪screening中從400幾位申請人篩選出10位來見,他們都是很年輕的,但當中5位臨時失約之餘又沒有預先通知。好了,他惟有再挑選5位補上,約見時他們全都答應來見,結果呢,這5位當中只有1位出現。即是說,15位申請人有9位爽約,其比率高達60%。

除了爽約外,C君還說了兩件令我慨嘆的事。話說C君公司的HR用電話陸續約見申請人時,其中一位申請人問公司座落在那一區,當聽到是港島中區後,他居然拋下一句“乜咁遠吓”就掛線了。哈哈,聽C君說,招聘廣告已經寫了公司及上班地址,如果這位申請人怕遠,當初又可必申請,浪費大家的時間呢?

另一個則更離譜,在面試前的一小時HR致電給其中一個申請人提醒他面試,他跟HR說正在途中。好了,他在約好的面試時間沒有來,HR怕有什麼意外致電給他,怎料此君說“我返緊工”,並向HR說要改在辦公時間後(晚上七時)來面試,C君無奈答應,最後結果一如所料,既沒有來也沒有來電,致電給他又關了電話。

有位網友在上一篇博文留言,不認為爽約是申請人有問題,卻認為C君和我的心態有問題。老實說,我只當此位人兄跟我開玩笑,否則的話,我們的價值觀實在相差太大了。因為在我心目中,爽約又沒有事前知會人家,是極不負責任的行為。另一位網友留言說香港職場招聘基層職位時爽約時有發生,我自己未請過會計文員,但招聘Junior Auditor時卻很少有爽約情況,更惶論約見15有9個放鴿子了。

無論如何,對招聘人來說,這些其實只是小事一宗,最多都只是影響工作日程而已。但對申請人來說卻不是小事,因為久而久之就會讓自己養成這種不負責任的習慣,對日後做人做事都有極壞的影響,最後受害的不是別人而是自己。

&&&&&&&&

19 則留言:

匿名 說...

究竟是新一代普遍問題,還是你朋友唔好彩?都領教過後生,佢地真唔知自己的責任,覺得教佢是應份,好似學校咁,捉住隻手教,連影印機jet paper都要叫你,如果咁教,不如自己做埋,拿埋份糧,咁佢地就明白
所以,請人不應先看年紀…等,當然好考眼光
Faithtrust100

匿名 說...

提議C君提供一個面試計分表俾佢地。
例如:100分滿分。準時刑達者可得10分。
遲1分鐘得9分...面試時,就好似考車牌咁,C君係面試官,揸住張設計好左既計分紙,
一邊面試,一邊俾分,面試完就叫佢地番歸等消息。
個個都見晒,就睇下邊個最高分。
然後才決定請邊位。
唔知行唔行得通呢?
有左呢份計分紙,更加可以預先SEND俾求職者,睇下佢有無興趣同信心去奪得職位。
佢有心既話,就會按計分紙的提示苦鍊一下,
當正考試奪A咁去狂操自己。
佢地係一班考試機械人,俾張MARKING SCHEME佢地,做下準備,對勞資雙方都可能係一個新嘗試。

hkeric 說...

如果一個人本身唔黎,又點會在乎比幾多分?而且佢見工準時都係扮比你睇,請左都唔一定係好事.

匿名 說...

唔嚟果過俾零分攞。
見工扮準時,唔理嫁啦,佢準時就俾10佢攞。
(咩E+準時都有得扮既咩??????)
(咁咩叫真準時,咩叫假準時先?????)
(我叫佢3點到,佢3點準時到就得嫁喇,
佢就可以有10分入場開始面試繼續攞分...)

超你鴉,hkeric,你個反駁好勉強喎。

話事話,你合留言係真留言,定係扮留言先?????

匿名 說...

我都講吓我想轉工時的心態。
1)見到d工好似幾好便會apply,未必會理會公司地點,大細。會send多d希望有機會interview,其中一個原因係希望睇吓自己有冇市場。
2)當有interview的時候,無論如何都先約個時間,當然不用請假便最好。若一定要office時間見都約咗幾日後先。
3)因要請假見工的關係,會返屋企再睇清楚個job ad,仔細研究一下工作性質,公司大細,行業,地點。睇吓是否值得請假去interview,如認為唔適合,interview前都會推咗先,因我都不太接受到no show。
4)到真的去到interview的時候,去到公司便會想吓自己是否接受到工作的環境,如大廈環境是否適合自己,到見的時候都會想如見我的是未來上司,會想自己是否可以跟他好好相處。有時一見工,便知道自己是否喜歡這公司,但都會照見工,而且表現的很有興趣,因始終都想有offer,只是想證實自己還有市場。
5)若果自己覺得唔適合的工約second interview而要office hour見的,多數會推,因雖然想有offer,但明知自己唔想做,無謂浪費假期去做d無謂事情。
6)到真係有offer的時候,會再把新工同舊工做對比,想想是否值得因為少少人工的上升而轉工。

匿名 說...

9:22朋友:
你知唔知咩叫見工??????
你見工,唔你你就公司,要公司就你?????
你見工,係想睇下自己有無市場????
你玩野呀,睇下自己有無市場?????

人地公司請人用,你就SEND份CV嚟睇下自己有無市場,見工時間就晒你,你嚟到望三望四,大晒呀你,玩野呀你,洗唔洗俾番車錢你俾埋錢你食飯呀??????

你俾個名嚟,我第日開公司,見工名單一定BLACKLIST你,仲要係第一個必BLACK重犯。

你老味,見工,都咁多'GI''GUT'。

Quality Alchemist 說...

我都有這樣的經驗, 不過來面試的是未畢業的大學生來做 student internship.

匿名 說...

9:33的朋友,
請你記住,工揾人,人搵工。

匿名 說...

10:25朋友:
你唔好當我低能啦。
你再睇多9:22果篇野,
出發點,完全淨係識得為自己諗,
都無試個企係公司立場諗。
我要請人,緊係請個幫到我手,
肯為公司瞓身,
以公司為先既員工,
只要佢做到野,
同唔好咁多'GI''GUT',
我做老闆,一定唔會待薄佢。

至於呢位唔知係阿哥定係阿姐既朋友,
就真係咪搞我。
呢D員工,我開公司就真係唔恨。
(恕我唔識貨喇)

你唔介意,咪你開間公司陪佢癲,
等佢去你公司瞄兩瞄,
等佢知下佢自己有無MARKET,
又要睇下佢有無見工時間同心情,
同睇下佢肯唔肯屈就咁囉。

Jason 說...

呢個世界咩人都有.
加上junior grade candidate亦係多為入世未深既朋友.
對9/15既飛機比率深表同情.

兩年前都請過人, 冇乜人放飛機, 反而係有個candidate, interview時表現到好想做. 攞左draft offer letter, 應承第二日返工, 但係最後都係no show. 打電話搵幾次先肯聽, 原來返左第二份工. 年紀唔細. 70後.

工搵人, 人搵工, 大家都要互相尊重.

想知道自己有冇market, 有電話約你己經夠, 唔想就第一時間推.

要請到肯搏肯捱既員工, 擺出大顧主既姿態亦未必可行.

至少當年小弟搵工時, 對於過份陶醉於大顧主心態既interviewer (有時只係見hr) 都會避之則吉. 如果hr都係咁, 老細更猖狂, 入到去可能冇好日子過, 怕怕.

匿名 說...

邊份工唔洗睇老細面色先,
開句聲,我仆去做。
出得嚟求財,就要預左。
老細發癲,你當佢唱歌。
有糧出既工就係好工。
呢個就係老哥我既職場求財之道。
總之老細大晒,你就好快有運行。

Kamwah 說...

工作態度問題,大家都說得年輕人如何不濟,好像上一代人表現很好似的。可是我的經驗是,其實公司的管理層也不見得很有責任感;也不見得他們有良好的工作態度。

這些問題在不同年齡都人都普遍存在。

匿名 說...

k君:
你唔好理上一代點先。
你做賊,係因為有其他人都做賊?
你唔好話我啦,我做賊,
真係無咩問題喎,我老豆都係一個賊啦。

呢D咩智慧呀,大佬。

Jason 說...

唔好理你老細係咪當你奴隸
但係你都要仆心仆命同佢做事, 不求回報

有呢種態度既員, 可以用"無私的奉獻"來形容.

匿名君既論點真係發人深省

Bittermelon 說...

其實出嚟工作,做員工有時"抵諗"少少預咗,不過好多老闆就好似奉旨咁,呢樣我就最反感.

Jason 說...

同感, 所謂"抵得諗",
負面睇, 係益左老細, 做多左野,
正面睇, 可以係充實自己, 走出原本識位既框框, 去多d了解其他同事既工作同公司. (當然, 如果只係被差遣去買tea, 影印, 碎紙等雜務, 上述論點並不適用)

但係亦不失為一種體驗.
未做過"影帝", 又點知道原來影印可以好花時間.
原來好好咁整理好文件, 可以慳到時候,
文件電子化不單可以慳紙, 連文件傳遞都可以快d.

唔碎紙, 又點知原來碎紙機真係好快爆滿, 用heavy duty 碎紙機係有其原因. 或進而養成平對recycle paper好好分類, 可以重用就重用, confidential就碎左佢.

觀點/角度

Bittermelon 說...

講得啱,所有事都有兩面,"抵得諗"好似益咗人自己蝕底,其實最終得益既好可能係自己.

出嚟做嘢咁耐,"抵得諗"既同事多數比其他人升得快一些.

匿名 說...

Jason,
你唔錯,我幾鍾意你,相信你一定可以幫到公司手。
其他既懶精,自私怪,頂心杉既員工,我真係無咩興趣俾錢佢地賺,一於當佢地係烏英曱它,拍走佢同趕走佢算數。

Kamwah 說...

想回覆 12:24 的匿名君。

我年紀已不算少,並不是甚麼「80 後」的人,自問亦算盡責。

我只是想說不盡責的人甚麼年紀都有,公司的管理層也存在這樣的人。你竟然可以將這件事理解為「你做賊,係因為有其他人做賊」,你的理解能力已出現偏差。

我也為「80 後」感到不值。部份年輕人不負責任,就被說成這個年齡群有問題;而上了年紀的人不負責任,自己不檢點,還反過來指責別人「你唔好理上一代點先」。

呢 D 咩智慧呀,大佬。

LinkWithin

Blog Widget by LinkWithin